الدوام و الخريف

مرحبا
ودي أكتب من ضيقة الصدر و الملل اللي أنا فيه
يمكن لأن اليوم صار حدث أثر على نفسيتي رغم إنه عدى على خير
أو يمكن لأن الدوام بعد بكره
ع العموم بديت يومي بكحة و طفش
دخلت غرفتي إلا و أشوف ياسمينتي

فقلت خلني ألعبها شويات

و أنا ألعبها طلع لي هالكائن و قط معنا هههههه

لعبنا و نمنا
صحيت من نومي و لي نفس أطبخ أي شيء
سويت لي بانكيك و تسليت

شوي ولا صحوا الحلوين

هههههه ياسو من الكسل و الطفش اللي فيها مالها خلق تتحرك

حتى الدادا زيها يعني موبس أنا زهقانة

بعدين فجأة قررت إني أسوي لي أندومي بالبيض
شبعت و بديت أرسم رسمات كلهم فشلوا هههههه
الدادا صحصح و يبي يلعب ، لعبته شوي

ورجعت أكمل رسم

:(

  فطلعت معي هالرسمة توصف نفسيتي

قررت ألونها بالفوتوشوب لأن لي فترة ما استخدمته
وهذي النتيجة

تتوقعون بعد كل اللي سويته راحت ضيقة الصدر ؟ أبدًاااااا
لأن اجتمعوا علي الدوام و الخريف .. شكلي برجع لشرنقتي

استهبال الدادا

بجد الدادا يحب الاستهبال

و بالذات وقت التصوير

علطول يتحول لبطة و من سابع المستحيلات يقوم

أو يجلس يتبطح و ينسدح السدحة الزهقانية

شايفين اشلون 

أكيد عذرتوني ، بالله انتبهوا للصور اللي جنب حوض سمكتي

تراها كانت تتخبى مني 

طيب ليش يا دادا ليش ؟

لما تشوف الكاميرا تسوي كذا و بمجرد ما أبطل تصوير تتحول لحلزونة أليفة دلوعة

و حتى وهي بعز حلزنتها بس أشغل الكام تتسمر

حتى رجلها ما تحركها 

و أنا أصير باباراتزي أراكض وراها

و هي تختار الزوايا  كأنها تقول لي نا نا نا نااااا

بجد مالت على اللي يصورك

و لما سكرت الكاميرا طلع يبغى ينام جنبي و يتحلزن 

لكني كنت أسرع منه وشغلت الكام و لقطت هالصورتين

المهم ختامه مسك مع السايكو الثاني

لكني هالمرة انتقمت ههههههههههه

الشعر الذي لا أدري

صباح الخير

لي مزاج أحدث مدونتي ، يمكن عشاني أودع الإجازة :(

فحبيت أكتب عن شي شاغلني و مو عارفة السبب

هالشيء هو شعر ياسو

طبعا كلكم كنتم عارفين مأساتي مع شعرها و جسمها طول الفترة اللي فاتت

كانت هزيلة و شعرها جاف و متلتلش و طول الوقت يتساقط و مسوي فراغات

حتى الجلد لونه أحمر و مليان قشور

شوفوها هنا

 

أنا أتوقع صار لها هالشي بسبب الحمل و الولادة ،هم الشيء الجديد اللي صار لها

لكن هالحين رجع شعرها طبيعي و بدون تساقط حتى تبقعات الحلاقة خفيفة

بصراحة أنا نفسي مو عارفة السبب و لا أحب أعطي وصفات طبية

لكن بقول وش التغييرات اللي صارت

1- أول حاجة الأكل ، أكلها زي ما هو ما تغير عشان كذا أنا مستبعدة هالإجراء.

2- الحلاقة ، كنت طول الفترة اللي فاتت أحلق لها ، يطول الشعر شوي و أرجع أحلقه لها إلا المرة الأخيرة منعوني أخواتي 

صورتين من آخر حلاقة لها ^^

3- الترويش كنت أروشها بالذات بالصيف اللي فات كل ثلاث أيام بفافو .

4- بطلت أطلعها فوق مع القطط بغرفتهم لأنم يحبون يلعبون بالسطح و هي اكتشفت إنها ما تستحمل الغبار.

هذي فقط التغييرات اللي سويتها و أتوقع إنها غيرت شوي من شعرها لكني ما أقدر أجزم إنها هي السبب ، يعني لا أحد ياخذها على محمل الجد

صور مفرقة لدبدوبي خروفي